أصوات فلسطينية شابـــــــة

هديل زهران

الفيس بوك وأهله

18 /03/ 2014

الفيس  بوك  عالم تاني عالم مُختلف جداً  حيطان كتيرة  وجهات نظر ونظرات وجه مختلفة لنفس الشغلة أي واحد وكل واحد صار عنده فيس وناس عندها وجهين قصدي فيسين من خلال الفيس بوك قدرت صاحبتي تشوف العريس اللي بعت إمه تشوفها بس فتحنا ع بروفايله ع الفيس بوك إذا شميت ريحة طبيخ جيرانكم وماعرفتها بتقدر تفتح ع فيس بوك واحد فيهم لأنه رح ينزل صور الطبخة بعد شوي وممكن تعرف من خلال الفيسبوك شو الكيس الأسود اللي مرقت فيه بنت الجيران بعد دقائق لمّا تنزل صور ع الفيس  بوك وتكتب

) وبتحط فوقها قلب حب ...I loveit تايم شيبس (

ع الفيسبوك ممكن يضيفوك ناس بأسماء مستعارة زي ملكة بإحساسي ورافعة راسي وهي نفسها بتسألك ع الدردشة أو برسالة ع الخاص  إنت صاحب الاسم الواضح والمعروف عفوا شو اسمك !  الفيسبوك يوم الجمعة جامع أو قناة إقرأ  الفيسبوك ديوان إذا مات صاحب حدا من الشباب ومباركة إذا خطبت وحدة   في الفيسبوك في لايكات بدون نفس ومش من قلب بتنعفها عن جنب وطرف حتى لو مش عاجبتك العبارة أو الصورة المكتوبة يعني توجهن بلغة الفيس " تفيسن"  عالفيسبوك عدوك ممكن يطلب منك بكبسة زر يكون ضمن الفررند ليست

تعلقنا ع حيطان الفيسبوك صار سيء ومبالغ فيه ومبتذل إذا بنت زعلانة بتحط صورة طفلة بتبكي وإذا معصبة بتحط صورة طفلة بتشد بشعرها إذا حابة تجاكر بنت صفها بتحط صورة طفلة بتلاوق  ع الفيسبوك بنحيي ذكرى النكبة والنكسة وصبرا وشتيلا وبنحط صور أبو عمار وجمال عبد الناصر والشيخ إمام في ذكرى رحيلهم  ع الفيسبوك بنستهزء في أحلام وبنمدح نجوى كرم ع الفيسبوك بترقع وبتفقع وبتطخ وبتسلخ وبتشمط لايك وقلة لايكات ممكن تأثر ع درجتك في الجنةأو تحطك بالدرك الأسفل من النار  وممكن تقطع خلفتك ع الفيسبوك في شير بالخير ع الفيسبوك ممكن تقلنا إذا سهران ب لايك اوشو لابس بكومنت ووين إنت ب شيك إن .    

عالفيسبوك ابوي وامي وأخوتي وخواتي خالتي وزوجها وولادها وبنتها اللي في صف خامس أوسادس عالفيسبوك عمتي وكناينها ع الفيسبوك.. عالفيسبوك  ولو ستي مريم ضلت عايشة وسمعت حدا قلي ضفتك عالفيسبوك كان شهقت ولطمت بإيدها عصدرها وقالتلي( عزا في دار اليهود شوهاظ الفيسبوك ياستي!)

 عالفيسبوك الميكانيكي وشوفير التكسي والكهربجي اللي بصلحلنا كهربا كل فترة وأخر مرة قلي عمي ضفتك عالفيسبوك وأنا تأكدت إنه هو لانه حاطط صورته مع صندوق العِدة وجنبه قشر بزر وبرتقال عالفيس بوك عالفيس معلمتي أيام المدرسة والمديرة ونائبتها وكُل ولادهم وبناتهم عالفيسبوك صاحبتي اللي حلفت لحماها إنه طوشة سلفاتها ع الوول وردحهم بالكومنتات هي ماشاركت فيها ولاحتى بلايك ورد عليها " الله سترك ولا كان إلي حكي تاني". 

عالفيس بوك حمار دارأبو محمود وسوبر ماركت وليد ومخبز عزيز وأظافر منى وحمّام هيا وأواعي سندس وشوطبخت لحماتها أخر عزومة ع الفيسبوك بنلعن السنة اللي مرقت وبنستقبل السنة الجديدة اللي رح نلعنها بس تخلص عالفيسبوك بنحيي رأس السنة وليلة القدر وشهر رمضان وعيد الفطر وعيد الأضحى وممكن حدا يقلك زمااان مابينت وين مختفي تقله هيني يقلك للااا بطلت أشوفك عالفيسبوك .

في ناس بتثور عالفيسبوك وناس بتثور في الفيسبوك بس اللي متأكدة منه إنه في ناس بتثير اشمئزازك عالفيسبوك وبقول لحالي الفيسبوك مابلبقلنا الفيسبوك لناس وناس.

مقالات أخرى

 
comments powered by Disqus